श्रीपञ्चमहालक्ष्मी मन्दिरको उत्पत्ति श्रीस्वामीज्यू महाराजको आध्यात्मिक साधना र अनुभवबाट प्रेरित भएको हो। एकान्तिक साधना गर्ने क्रममा उहाँले श्रीपञ्चमहालक्ष्मीको साक्षात्कार गर्नुभयो। यस असामान्य अनुभवले उहाँमा आन्तरिक शान्ति, प्रसन्नता, र समाजसेवाको भावना जागृत गरायो। त्यसपछि सामूहिक आराधना र पूजा प्रणाली सर्वसुलभ बनाउने उद्देश्यले श्रीपञ्चमहालक्ष्मी माताको आराधना शुभारम्भ गर्नुभयो।
यो मन्दिर भक्तपुरको छालिङ (साबिक छालिङ गा.वि.स. ९) मा श्रीशालीनदी र श्रीदेवनदीको संगमस्थल नजिकै अवस्थित छ। यो स्थान श्रीस्वस्थानी व्रतकथाको उद्गमस्थल र रत्नचूड, मणिचूड, र दोलागिरी पर्वतहरूको त्रिकोणात्मक संगम रहेको क्षेत्र हो।
वि.सं. २०५७ मा पशुपतिक्षेत्रमा आयोजित विश्वशान्ति नववर्ष शुभकामना महायज्ञका क्रममा श्रीस्वामीज्यू महाराजले श्रीपञ्चमहालक्ष्मीको दर्शन गराउन र वैदिक पूजा विधिको थालनी गर्नुभयो। सोही महायज्ञमा भक्तपुर छालिङका वलराम कटुवाल र दिलकुमारी कटुवालले चार रोपनी जग्गा मन्दिर निर्माणका लागि दान गर्नुभयो।
यस क्षेत्रमा श्रीशालग्राम भगवान्को प्राकट्य र श्रीपञ्चमहालक्ष्मी सहित भगवान् श्रीमुक्तिनाथको प्राण-प्रतिष्ठापछि यो पवित्र भूमिमा मन्दिर निर्माणको संकल्प गरिएको थियो।
श्रीपञ्चमहालक्ष्मी मन्दिर विश्वकै पहिलो मन्दिर हो, जसले नेपालको अध्यात्मिक गौरवलाई थप उजागर गरेको छ। यस मन्दिरले मानवजातिलाई सुख, शान्ति, समृद्धि, र मित्रताको मार्गमा प्रेरित गर्ने श्रीमुक्तिनाथ बाबाज्यूको उद्देश्यलाई सार्थक बनाएको छ।
